Rhai meddyliau ar brosiect ymchwil technoleg fideo’r bartneriaeth

Gan Trudi Rees-Davies, Tiwtor Ymarfer (Ysgol Gynradd Pen Rhos, Llanelli) Mehefin 2024.

Yn ystod y blynyddoedd diwethaf mae fy rolau gyda Phartneriaeth y Brifysgol Agored wedi amrywio o Fentor a Chydlynydd Ysgolion i'm swydd bresennol fel Tiwtor Ymarfer, rôl dwi wedi bod wrth fy modd yn ei chyflawni dros y ddwy flynedd ddiwethaf. Mae'r rôl hon wedi bod yn arbennig o werth chweil gan ei bod yn caniatáu imi weld twf a datblygiad disgyblion ifanc ac athrawon dan hyfforddiant. Cefais wahoddiad i gymryd rhan mewn prosiect ymchwil gyda'r nod o archwilio defnydd ac effeithiolrwydd technoleg fideo wrth fonitro a gwerthuso athrawon dan hyfforddiant. O ystyried fy heriau blaenorol yn defnyddio technoleg yn fy rolau mentora, roeddwn yn frwdfrydig am gyfrannu at y prosiect hwn.

Gwnaethom drefnu sawl cyfarfod ar-lein i gytuno ar y cynllun ymchwil a dyrannu tasgau. Fy rôl i oedd cynnal cyfweliadau gydag athrawon dan hyfforddiant, athrawon newydd gymhwyso, ac uwch arweinwyr. Esgorodd y trafodaethau hyn ar lawer o bethau gwerthfawr i’w hystyried: 

• Pryder a hunanymwybyddiaeth: Roedd athrawon dan hyfforddiant yn aml yn teimlo'n bryderus am recordio eu gwersi, gan ofni na fydden nhw'n perfformio'n dda neu y gellid craffu’n rhy llym ar y recordiadau.
• Heriau technegol: Roedd problemau technegol cyffredin yn cynnwys y fideo yn methu â recordio, toriadau pŵer, ac anawsterau gyda'r offer recordio. Weithiau roedd yr heriau hyn yn cysgodi manteision posibl technoleg fideo.
• Adborth a myfyrio: Er gwaethaf yr heriau, cydnabu llawer o gyfranogwyr y gallai recordiadau fideo fod yn offeryn pwerus ar gyfer hunanfyfyrio a chael adborth adeiladol.

Cynhaliais grŵp ffocws gyda disgyblion hefyd a oedd wedi cael eu recordio yn ystod gwersi gyda'r athrawon a oedd dan hyfforddiant ar y pryd. Roedd yr ymatebion gan ddisgyblion yn ddoniol ac yn onest, gan ddarparu persbectif ffres ar y defnydd o dechnoleg fideo yn yr ystafell ddosbarth. Gwnaeth y plant gymryd rhan lawn yn y drafodaeth, gan gynnig adborth gonest, di-flewyn-ar-dafod am eu profiadau:

• Ymgysylltu a mwynhad: Roedd llawer o ddisgyblion wedi mwynhau'r broses o gael eu recordio – roedd yn brofiad newydd a chyffrous iddynt.
• Gonestrwydd a hiwmor: Roedd ymatebion y disgyblion yn aml yn ddoniol, gan adlewyrchu eu barn ddi-flewyn-ar-dafod ar ddeinameg yr ystafell ddosbarth a'r profiad newydd o gael eu recordio.
• Ymwybyddiaeth a pherfformiad: Soniodd rhai disgyblion eu bod yn fwy ymwybodol o'u hymddygiad o wybod eu bod yn cael eu recordio, a arweiniodd weithiau at fwy o gyfranogiad a thalu sylw yn ystod gwersi.
• Roedd rhai dan yr argraff eu bod yn cael eu recordio er mwyn i'r Pennaeth allu arsylwi ar eu dysgu 'o bell'!

Mae bod yn rhan o'r prosiect ymchwil hwn wedi bod yn brofiad hynod werth chweil. Mae'r adborth gonest gan ddisgyblion, ynghyd â meddyliau’r athrawon dan hyfforddiant ac uwch arweinwyr, yn tanlinellu pwysigrwydd a photensial defnyddio technoleg fideo wrth addysgu a gwerthuso athrawon.

Fel addysgwr sy'n ymroddedig i feithrin twf myfyrwyr ifanc a darpar athrawon, rydw i’n ymrwymedig i barhau â'r ymchwil hon a gweithredu ei chanfyddiadau. 

I ddarllen mwy gan Trudi am ei meddyliau ar y prosiect, cliciwch yma.

Ac am adroddiad llawn y prosiect ymchwil cliciwch yma.