Athrawon ieithoedd tramor newydd yng Nghymru i gael hyfforddiant ar raglen arloesol

Mae Llywodraeth Cymru wedi cyhoeddi y bydd ieithoedd tramor modern yn cael eu cynnig fel ail bwnc newydd ar ei thystysgrif ôl-raddedig mewn addysg (TAR), a ddarperir gan y Brifysgol Agored yng Nghymru.  

Yn dechrau ym mis Medi 2025, gall myfyrwyr ar y rhaglen TAR dwy flynedd o hyd nawr astudio ar gyfer y dystysgrif gyda ieithoedd tramor modern fel ail bwnc. Mae myfyrwyr graddedig yn derbyn statws athro cymwys (SAC) llawn, sy’n eu galluogi i addysgu mewn ysgol.  

Mae 275 o fyfyrwyr wedi cofrestru ar raglen y Brifysgol Agored yng Nghymru ar hyn o bryd, sy’n cynnwys 302 o ysgolion partner ym mhob ardal ar draws Cymru. Mae rhai myfyrwyr eisoes yn gyflogedig mewn ysgolion partner (llwybr cyflogedig), tra bod eraill yn gweithio mewn mannau eraill (llwybr rhan-amser) ac yn cymryd eu camau cyntaf i fyd addysg fel gyrfa.  

Ers 2020, mae cwrs TAR y Brifysgol Agored yng Nghymru wedi bod ar gael ar gyfer ystod o bynciau uwchradd eraill, yn ogystal ag addysgu ysgol gynradd, a gellir ei astudio yn Gymraeg neu Saesneg. Ar y llwybr cyflogedig yn benodol, mae pum deg y cant o gyllid grant ar gael ar gyfer astudio drwy gyfrwng y Saesneg ar lefel uwchradd, ac mae 100% o’r cyllid ar gael ar gyfer astudio drwy gyfrwng y Gymraeg.  

'Mae addysgu yn broffesiwn gwych, a bydd yr estyniad hwn o raglen TAR gan y Brifysgol Agored a’r ffordd hyblyg y caiff ei chyflwyno yn caniatáu i fwy o bobl ddechrau ar yr yrfa wych hon, meddai Lynne Neagle, Ysgrifennydd y Cabinet dros Addysg. 'Rwy’n gobeithio y bydd y cwrs newydd a chyffrous hwn yn ysbrydoli athrawon y dyfodol i archwilio’r proffesiwn hwn, a hefyd codi proffil ieithoedd tramor modern.'

'Ers 2020, mae ein rhaglen TAR wedi mynd o nerth i nerth, a bydd cyflwyno ieithoedd tramor modern yn agor y drws i fwy o bobl sydd wedi ystyried addysgu fel gyrfa,' dywedodd Dr Sarah Stewart, Cyfarwyddwr rhaglen TAR y Brifysgol Agored yng Nghymru. 'Yn gynyddol, mae athrawon y dyfodol yn gweld budd astudio’n hyblyg dros ddwy flynedd, sy’n caniatáu iddynt gyfuno’r cwrs â gwaith ac ymrwymiadau teuluol. Mae hyn oll wedi bod yn bosib, diolch i’n staff a’n myfyrwyr, heb sôn am y berthynas wych sydd gennym gyda Llywodraeth Cymru, sector addysg Cymru ac ysgolion ym mhob rhan o’r wlad.'

Mae Gemma Zeeman o Gaerdydd wedi cwblhau ei chymhwyster TAR gyda’r Brifysgol Agored yng Nghymru, ac yn ddiweddar mynychodd seremoni raddio yn yr ICC yng Nghasnewydd.  

Dewisais astudio’r cwrs TAR yn y Brifysgol Agored yng Nghymru gan fod y cwrs rhan-amser yn newid bywyd yn gyfan gwbl,' meddai Gemma. 'Nid wyf yn sicr y gallwn fod wedi ei gwblhau mewn blwyddyn. Rhoddodd gydbwysedd i mi ac amser gyda fy merch, yn union fel oedd ei angen arnaf.'