Cyhoeddi ymchwil newydd i wasanaethau ar gyfer teuluoedd mewn galar

Mae’r Brifysgol Agored wedi cyhcwyn astudiaeth newydd i’r Gwasanaeth Archwilio Meddygol a’i effaith ar deuluoedd mewn galar.

Cyflwynwyd y Gwasanaeth Archwilio Meddygol ym mis Ionawr 2021. Meddygon cymwys yw archwilwyr meddygol sy’n annibynnol oddi wrth y rhai fu’n gofalu am yr ymadawedig. Maent yn asesu cofnodion meddygol pobl sydd wedi marw, ac yn nodi achos y farwolaeth. Mae’r gwasanaeth hefyd yn galluogi teuluoedd i ofyn cwestiynau am y gofal a roddwyd i’w hanwyliaid gan wasanaethau iechyd.

Bydd y gwaith ymchwil dan arweiniad Dr Kerry Jones, Uwch Ddarlithydd Gofal Diwedd Oes yn y Brifysgol Agored, a chyd-gadeirydd Grŵp Ymchwil Gofalwyr y brifysgol. Yn ymuno â hi bydd Sharon Mallon Uwch Ddarlithydd Gwaith Cymdeithasol a Llesiant ym Mhrifysgol Swydd Stafford, sydd hefyd yn gyn-academydd yn y Brifysgol Agored.

‘Drwy ddod i ddeall mwy am y ffordd mae’r gwasanaeth hwn yn cyfathrebu â theuluoedd ar ôl marwolaeth anwylyn, gallwn helpu i lywio’r gwasanaeth wrth ei gyflwyno ledled Cymru a Lloegr,’ meddai Dr Jones.

‘Hoffem siarad ag unrhyw un sydd wedi derbyn cymorth gan y Gwasanaeth Archwilio Meddygol. Gwyddom y gall siarad am farwolaeth anwylyn a’r galar a ddaw yn ei sgil fod yn anodd. Gallwn eich sicrhau bod gan ein hymchwilwyr brofiad o siarad â theuluoedd ynglŷn â galar a byddant yn eich cefnogi chi drwy gydol eich cyfraniad i’r astudiaeth hon.’