Cyllid loteri newydd i brosiect treftadaeth Cymru y Brifysgol Agored

Mae'r Brifysgol Agored yng Nghymru wedi cael cyllid i ddatblygu prosiect treftadaeth arloesol.

Mae Cronfa Treftadaeth y Loteri Genedlaethol (NLHF) wedi dyfarnu grant i'r Brifysgol Agored a'i Chyfadran Gwyddorau a Chelfyddydau Cymdeithasol i gefnogi cam nesaf REACH Cymru (trigolion yn ymgysylltu â'r celfyddydau, diwylliant a threftadaeth), a sefydlwyd mewn partneriaeth ag Amgueddfa Cymru. Bydd tîm y prosiect yn cefnogi pobl mewn pum rhan yng Nghymru i archwilio eu cysylltiadau â'u hardal, yn ogystal â'i hanes, drwy'r celfyddydau.

Mae'r cyhoeddiad hwn yn dilyn y cam datblygu a fu yn 2023, a gafodd ei ariannu hefyd gan Gronfa Treftadaeth y Loteri Genedlaethol .

Yn ystod y cam hwnnw, defnyddiodd aelodau'r cymunedau ffurfiau celf fel paentiadau a darluniau, ysgrifennu'n greadigol yn ogystal â thynnu ffotograffau er mwyn myfyrio ar dreftadaeth eu hardaloedd lleol. Bydd y cam nesaf yn ymestyn dros 150 o ddigwyddiadau celf a threftadaeth dros y ddwy flynedd nesaf

‘Diolch i chwaraewyr y loteri ac i Gronfa Treftadaeth y Loteri Genedlaethol, rydym wedi llwyddo i ddatblygu REACH Cymru fel bod modd i ni weithio gyda mwy o bobl nag erioed o'r blaen, gan gyflwyno sgiliau creadigol newydd iddynt a'u cysylltu â'u treftadaeth,' dywedodd Dr Richard Marsden, arweinydd academaidd y prosiect.

'Bydd REACH Cymru yn helpu pobl o bob cefndir i ddeall mwy am eu cymunedau a'u hanes, drwy weithgareddau creadigol. Drwy wneud hyn, byddwn yn dangos budd dysgu gydol oes, helpu i wella sgiliau, ac yn annog pobl i feddwl am eu llesiant eu hunain.

Yn 2020-22, cyflwynwyd REACH BG gan Y Brifysgol Agored - prosiect tebyg i bobl sy'n byw ym Mlaenau Gwent

Mae'r cynlluniau ar gyfer cam nesaf REACH Cymru yn cynnwys:

• arddangosfa ddigidol ar wefan REACH Cymru
• arddangosfa wyneb yn wyneb yn Amgueddfa Werin Cymru Sain Ffagan
• archif ar-lein o'r gwaith a gynhyrchwyd gan bobl a oedd yn rhan o'r prosiect ar wefan Casgliad y Werin Cymru
• arddangosfeydd a gosodiadau dros dro ledled y pum cymuned
• tri chwrs newydd ar-lein ar OpenLearn, sef llwyfan dysgu am ddim Y Brifysgol Agored.

Gwybodaeth am Gronfa Treftadaeth y Loteri Genedlaethol

Cronfa Treftadaeth y Loteri Genedlaethol yw’r ariannwr mwyaf o dreftadaeth y DU. Gan ddefnyddio arian a godir gan chwaraewyr y Loteri Genedlaethol rydym yn cefnogi prosiectau sy’n cysylltu pobl a chymunedau â threftadaeth. Ein gweledigaeth yw gwerthfawrogi a gofalu am dreftadaeth a’i chynnal ar gyfer pawb, nawr ac yn y dyfodol. O adeiladau hanesyddol, ein hetifeddiaeth ddiwydiannol a’r amgylchedd naturiol, i gasgliadau, traddodiadau, straeon a mwy. Gall treftadaeth fod yn unrhyw beth o’r gorffennol y mae pobl yn ei werthfawrogi ac eisiau ei drosglwyddo i genedlaethau’r dyfodol. Credwn mewn nerth treftadaeth i danio’r dychymyg, cynnig llawenydd ac ysbrydoliaeth, ac i ennyn balchder mewn lle a chysylltiad â’r gorffennol.